Х Міжнародны форум «Беларусь мясная» праходзіць у Мінску

Гэтае мерапрыемства — адно з галоўных падзей у мясной індустрыі. Адзіны ў краіне форум у фармаце В2В для прадстаўнікоў мясной галіны стаў прафесійнай пляцоўкай, на якой абмяркоўваюцца тэндэнцыі ў развіцці вытворчасці і збыту прадукцыі, прымаюцца рашэнні, якія паўплываюць на далейшае напаўненне рынку.

У гэтым годзе форум сабраў больш 350 удзельнікаў, сярод якіх — кіраўнікі і галоўныя спецыялісты мясакамбінатаў і фабрык, пастаўшчыкі абсталявання і тэхналагічных рашэнняў, прадстаўнікі ўлады і прафесійных галіновых саюзаў. Форум дазваляе аб’яднаць бізнес, навуку і рытэйл.

Удзельнікі форуму знаёмяцца з вынікамі маркетынгавых даследаванняў, прагнозамі па далейшым развіцці галіны. На аснове аналізу рынкаў мясной прадукцыі, у тым ліку міжнародных, могуць бачыць, якая прадукцыя запатрабавана сёння і якім будзе запыт пакупніка праз 5-10 гадоў. Напрыклад, калі падрасце і стане плацежаздольным пакаленне «зумераў», рынак можа кардынальна змяніцца. Названая катэгорыя будзе задаваць новыя трэнды — а гэта не толькі іншыя віды прадукцыі, але і тое, як тавар будзе падавацца. Ужо сёння расце колькасць спантанных пакупак — сучасны спажывец не ідзе ў краму са спісам прадуктаў, а робіць выбар непасрэдна каля прылаўка. Таму падчас форуму ўдзельнікі абмяркоўваюць, як перастроіцца пад новыя патрэбы, якімі павінны быць асартымент, упакоўка, брэндынг прадукцыі. Падчас дзелавой праграмы гэтыя пытанні абмяркоўваюцца на круглых сталах, у час практычных кейс-сесій, удзельнікі вывучаюць новыя правілы гульні на сучасным рынку, атрымліваюць канкрэтныя кейсы, звязаныя з прасоўваннем прадукцыі, узаемадзеяннем з гандлёвымі сеткамі, фірменнай розніцай. Уласна, тэма форуму — «Формула мясной паліцы», прычым арганізатары ўжо аформілі яе ў канкрэтную практычную мадэль: «спажывец+рытэйл+асартымент+тэхналогіі+прыбытак».

Сярод пытанняў, узнятых на форуме, — кіраванне вытворчасцю, стандартызацыя, стратэгія развіцця і мадэрнізацыі прадпрыемстваў, маркіроўка, выкарыстанне новых тэхналогій. Асобная ўвага — забеспячэнню якасці і бяспечнасці прадукцыі.

Падчас адкрыцця форуму намеснік міністра сельскай гаспадаркі і харчавання Ігар Дарафейчык расказаў, што за мінулы год вытворчасць мяса склала 101 % да ўзроўню папярэдняга перыяду, каўбасных вырабаў — 103 %. Узровень самазабеспячэння дасягнуў 140,2 працэнта. Сёння мясаперапрацоўчая галіна развіваецца даволі хуткімі тэмпамі, прынятая на пяцігодку новая дзяржаўная праграма «АПК будучыні» будзе садзейнічаць далейшаму росту. Запланавана будаўніцтва буйных малочна-таварных комплексаў, рэканструкцыя і мадэрнізацыя прадпрыемстваў, якія займаюцца перапрацоўкай.

Безумоўна, гэта дазволіць у тым ліку павялічваць і экспартны патэнцыял Беларусі. Але падчас форуму было ўзнята пытанне, што важна сачыць за сусветным рынкам, бо ёсць і іншыя краіны, якія нарошчваюць вытворчасць прадуктаў харчавання. Важна адсочваць, у якіх напрамках (так стаўка робіцца на краіны Азіі і Афрыкі) будзе павялічвацца запыт на мяса і якая менавіта прадукцыя з’яўляецца найбольш запатрабаванай; як развіваць вытворчасць у тым жа сегменце Халяль, разлічваць яе сабекошт і «ўкладвацца» ў сусветныя цэны на такую прадукцыю.

Надзвычайны і Паўнамоцны Пасол Рэспублікі Беларусь у Рэспубліцы Казахстан Аляксей Багданаў адзначыў, што сёння Казахстан з’яўляецца стратэгічным рынкам для экспарту беларускай мясной прадукцыі. Гістарычна ў гэтага народа мяса было асновай рацыёну, і сёння 85 працэнтаў таварнага чэка мясцовых спажыўцоў прыпадае на мясную прадукцыю. Нягледзячы на тое, што краіна сама вырабляе мяса, яна не можа задаволіць унутраныя патрэбы, якія з кожным годам павялічваюцца, бо дынамічна расце насельніцтва. Экспарт мяса і гатовай прадукцыі сёння складае каля 400 тысяч тон мяса за год. Асноўныя экспарцёры ў Казахстан — Беларусь і Расія. Асаблівы запыт у казахстанскага спажыўца — на беларускую ялавічыну ў розных разрубах, у тым ліку для стэйкаў. Але асноўны акцэнт сёння трэба рабіць на пастаўку ў Казахстан гатовай мясной прадукцыі: каўбасных вырабаў, далікатэсаў, кансерваў. Дыпламат адзначыў, што, па выніках мінулага года, аб’ём тавараабароту паміж Беларуссю і Казахстанам вырас на 24 працэнты, беларускі экспарт упершыню ў гісторыі перавысіў 1 мільярд долараў.

У рамках форуму адбылося ўзнагароджанне лепшых экспарцёраў (прэмія «100 дарог экспарту») і вытворцаў (прэмія «Вялікія зоркі мясной справы»).